STEG ó día · Novas

As Asembleas Abertas do Ensino Público convocan unha consulta: o profesorado decide o seguinte paso

O 16 de novembro, as Asembleas Abertas do Ensino Público van lanzar unha consulta en liña, completamente anónima, na que cada voto corresponde a unha persoa docente asociada a un enderezo de correo de edu.xunta.gal, para que todo o profesorado galego poida decidir escollendo entre as diferentes opcións de mobilización para este curso: desde grandes mobilizacións e folgas en decembro ata paros indefinidos ou alternos en marzo.

Podes consultar todos os detalles, preguntas e a ligazón para votar en https://enquisa.asembleasensino.gal/. A consulta estará activa até o 20 de novembro.

Despois de meses de traballo nos centros, recollendo as principais preocupacións do profesorado —ratios elevadas, falta de persoal, exceso de burocracia, deficiencias nas infraestruturas e falta de profesionais para atender adecuadamente o alumnado—, chega o momento de decidir colectivamente cal debe ser o seguinte paso. Escoitando a voz de todo o profesorado, tanto de quen está disposto a continuar mobilizándose como de quen ten dúbidas ou considera que deben explorarse outras vías.

Todas e todos nós decidimos o seguinte paso. Participa na consulta!