Milleiros de persoas participaron este domingo en Compostela na manifestación convocada por SOS Sanidade Pública e que contou co apoio de organizacións políticas, sindicais, profesionais, estudiantís, veciñais das asembleas do 15M e de numerosos colectivos entre os que destacou o da educación.
O voceiro da plataforma SOS Sanidade Pública, Manuel Martín, leu o manifesto co que rematou a manifestación no que se denuncia que as medidas de recorte tomadas polo Goberno Central, coa complicidade da Xunta de Galicia, introducen cambios fundamentais no sistema sanitario público que atentan contra a universalidade, a accesibilidade, a equidade e o carácter redistributivo da Sanidade Pública, e supoñen o inicio dunha contrarreforma sanitaria.
Na defensa so ensino público salientouse que “o ensino non é unha mercadoría, nunca pode ser medido con criterios de rendibilidade económica, a súa oferta e calidade debe estar garatida para todas e todos independentemente da procedencia socioeconómica ou xeográfica de cada quen”.
Desde o STEG agradecemos a todas as persoas asistentes o seu compromiso coa loita por defender o modelo social construido colectivamente con tanto esforzo ao longo das últimas décadas, e que nestes momentos periga non tanto pola crise, como nos queren facer crer, como pola contrarrevolución ideolóxica que estamos a padecer.