STEG ó día · STEG opina

Esta circular impón unha serie de condicións económicas que non teñen en conta as diferenzas entre cafeterías escolares de ámbito rural e ámbito urbano e que, ademais, con toda probabilidade, resultarán imposibles de manter, pola maioría das cafeterías dos centros educativos actuais.

O primeiro que temos que preguntarnos é: ¿a que intención obedece esta normativa? ¿Existía algún problema que fose preciso arranxar nestes espazos? Desde o STEG entendemos que non.

Pódese predicir que esta normativa levará ao peche de moitas cafeterías dos centros educativos actuais. Non sabemos se a Consellaría acariña a intención de que sexan xestionados ao estilo dos comedores por unha gran empresa que, ao mellor, alá onde non sexan rendíbles acabará substituíndo ás actuais cafeterías por máquinas expendedoras.

Desde o STEG queremos lembrar que na maior parte dos casos, e moi especialmente no ámbito rural e vilego, esta cafeterías están xestionadas por familias naturais e residentes na propia comarca en que o centro educativo está encravado, co que redundan no mantemento do emprego e no asentamento da poboación. Este carácter próximo tamén se fai sentir na relación co profesorado e co alumando, sobardando parámetros estritamente mercantís.

Desde o STEG queremos engadir ao anterior que a Consellaría, ao modificar o marco normativo en pleno mes de xullo, despreza unha vez máis o importante traballo das direccións dos centros, cargándolles outra función (o concurso das cafeterías terá que ser anual) que semella esquecer que a súa dedicación principal debe ser a pedagóxica.

No día de hoxe o STEG solicitou a paralización e retirada desta circular ante a Consellaría de Educación e o inicio de conversas coa comunidade educativa para primeiro analizar as necesidades dos centros nesta cuestión.

Secretariado Nacional do STEG
xullo 2013