STEG ó día · STEG opina

O Goberno de Mariano Rajoy, coa aprobación do anteproxecto de Orzamentos Xerais do Estado para 2013, volve cargar contra os soldos e as condicións laborais do profesorado e do conxunto de empregadas e empregados públicos, ao conxelar os salarios por terceiro ano consecutivo.

Iso significa unha perda acumulada de poder adquisitivo entre o 25% e o 30 %, nos últimos dez anos, nun momento especialmente duro polo incremento do custo da vida que antes de que finalice o ano xa se sitúa nun 3,5 % pola subida do IVE, ao que hai que engadir a perda da próxima paga extraordinaria de Nadal. A inclusión das dúas pagas extraordinarias para o próximo ano nos PGE carecen, xa que logo, de toda fiabilidade, dado que en calquera momento, como ocorreu neste ano, calquera disposición normativa de urxencia, como o RDL 20/2012, pode eliminar a contía orzamentada respecto diso.

Este novo castigo circunscríbese nunha serie de ataques á educación pública, como o incremento das ratios e a consecuente redución do persoal docente e aumento das horas lectivas, ou a redución de unidades na escola rural, todo en detrimento da calidade educativa, ou tamén en graves recortes aos dereitos laborais, tal como o endurecemento nas condicións de incapacidade laboral que se aplica a partir do 1 de outubro.

Outra falacia a constitúe o límite de ata o 10 % na reposición de efectivos, límite que na práctica supuxo a nulidade de oferta de emprego público no sector na maioría das comunidades autónomas. Ademais, á finalización da xubilación anticipada LOE engádese agora o anuncio da desaparición de calquera tipo de xubilación anticipada ou parcial.

O STEG rexeita de plano este anteproxecto de PGE, que segue castigando inxustamente ao profesorado e ao conxunto de traballadoras e traballadores públicos por unha crise que non creamos, denuncia a reiterada ausencia de negociación coas organizacións sindicais de todo aquilo que afecta ás condicións laborais dos colectivos e advirte que estas agresións aumentan aínda máis a tensión existente, lévannos a unha maior confrontación e ao endurecemento das mobilizacións en marcha.