STEG ó día · STEG opina

Pola liberdade de expresión no sistema educativo galego

Abonda de censura e abuso de poder!

A Consellaría de Educación leva meses asediando e censurando á comunidade educativa, forzando ás inspeccións a exercer un papel fiscalizador que nada ten que ver coa súa función primordial de apoio e interlocución entre a comunidade educativa e admnistración. 

Isto leva acontecendo en reiteradas ocasións onde a administración educativa está a  interferir, amoestar e reprender actos organizados pola comunidade educativa de distintos centros:

• Prohibición dun encontro, organizado por este sindicato, de alumnado coa Embaixada de Palestina para coñecer de primeira man a situación de xenocidio que vive o pobo palestino.
• Chamada de atención nun CEIP pola presencia dunha faixa, promovida pola ANPA da escola, a favor do uso do galego na manifestación nacional do 23 de febreiro de 2025.
• Recriminación a distintos centros educativos por organizar actividades sobre o impacto ambiental de Altri.

Do STEG queremos denunciar esta política de persecución e censura que está levando a cabo a Xunta de Galicia e a súa Consellaría de Educación nos centros educativos galegos. Consideramos que están sendo gravemente vulnerados dereitos fundamentais como a liberdade de expresión, a liberdade de pensamento político ou a liberdade de manifestación, todos eles establecidos na Declaración de Dereitos Humanos (artigos 18º, 19º, 20º e 21º).

Do STEG chamamos á alerta contra esta situación e a alzar ben alto as nosas voces por mantermos unha escola pública, libre e igualitaria onde a diversidade e a liberdade de expresión continúen a ser direitos fundamentais e inviolábeis por ningún partido ou institución que se diga de democrática, e, moito menos, pola propia administración educativa.