STEG ó día · STEG opina

Que retiren ao Valedor do Pobo

A polémica xerada ao redor da denuncia de UPyD ante o Valedor do Pobo solicitando a retirada do libro da editorial Vicens Vivens de Coñecemento do Medio de 5º de Primaria por non citar ao castelán como lingua oficial ao mesmo tempo que a lingua propia de Galiza evidencia a estratexia do discurso da “imposición” fronte ao da liberdade, representada ésta neste caso, supostamente, pola “obxectividade” na presentación do artigo 5. do Estatuto de Autonomía.

Que o Valedor do Pobo solicite a retirada dun libro por "información inexacta e incompleta e, polo tanto, falsa", cando na páxina anterior á da polémica cítase explícitamente o estatuto xurídico do castelán conforme á Constitución tanto en Galiza como no resto do estado, acusando ao libro de “carecer do rigor científico imprescindible”, leva ao STEG a solicitar a dimisión do Valedor por ofrecer unha “información inexacta e incompleta, e polo tanto, falsa” sobre o contido do libro ao redor  dun tema tan fundamental para o pobo ao que debe defender como é a nosa lingua propia. As declaracións do Valedor carecen, asemade, do “rigor científico imprescindible” ao afirmar que a información dada polo artigo 5.1 do noso Estatuto de Autonomía é inexacta, revelando, sen dúbida, o que subxace a esta polémica intereseira…hai a quen lle escoce a definición do galego como lingua propia, interesados ou interesadas como están en reescribir a historia do país e da lingua.

Desde o STEG solicitamos,a retirada de Benigno López á fronte dunha institución que debe representar a todo o pobo galego, e non estar, xa que logo, ao servizo das e dos que alimentan a persecución do noso idioma.

Enlace ás páxinas do libro

Enlace ao comunicado da CGENDL