STEG ó día · Mobilizacións · 1º de Maio

O día 1 de maio é unha data de referencia para todas as persoas e organizacións que, por todo o planeta e tamén na Galiza, loitamos día a día pola democracia, a construción dun mundo máis xusto, a equidade e a xustiza sociais, a redistribución da riqueza, polos servizos públicos universais e de calidade, na defensa das persoas desposuídas, polos dereitos das clases populares e dos traballadores e traballadoras, en definitiva, polo ben común.

Acontece que os poderes e sectores dominantes, sexa en Bruxelas, en Madrid ou en Compostela, de ideoloxía neoliberal e raibosamente capitalistas, perpetran neste instante un ataque feroz contra as maiorías sociais e os seus dereitos e conquistas. Ese ataque brutal e despiadado, que fai recaer os custes da crise en que non ten culpa dela, tradúcese día tras día en numerosas inxustizas: niveis de desemprego masivos, precariedade e deterioro das condicións laborais, EREs continuos, perdas salariais e de dereitos, aumento das desigualdades, deterioro dos servizos sociais, represión, trabas no acceso á sanidade, privatización do dereito á educación, etc.

Semellante agresión, sabémolo, só pode ser freada e contrarrestada na base da sociedade por unha forte e masiva rede de solidariedade, da que as organizacións sindicais debemos ser parte activa e irrenunciábel, xunto con outras moitas expresións da sociedade civil (plataformas, mareas, movementos...). Unha rede, alianza ou unión horizontal e auto-organizada, que sobre a base do respecto mutuo e da asumpción do pluralismo ideolóxico existente no corpo social que loita por unha sociedade igualitaria e democrática, teña a virtualidade de expoñer, canalizar e defender con claridade e eficacia as demandas máis urxentes da maioría social, para forzar mudanzas significativas na actual situación.