Profesorado · Profesorado interino · Acceso e estabilidade

O STEG congratúlase da claridade e contundencia dos termos con que se expresou o Tribunal de Xustiza da Unión Europea (TXUE) respecto ás cuestións expostas polo Tribunal Superior de Xustiza de Madrid sobre as relacións laborais dos traballadores que encadean numerosos contratos temporais ao longo dos anos nas administracións públicas

A resposta do TXUE foi rotunda ,na súa sentenza do 22 de Febreiro do 2024,  e sen ambaxes pois, por unha banda:

“oponse a unha normativa nacional que establece a convocatoria de procesos de consolidación do emprego temporal mediante convocatorias públicas para a cobertura das prazas ocupadas por traballadores temporais, entre eles os traballadores indefinidos non fixos, cando dita convocatoria é independente de calquera consideración relativa ao carácter abusivo da utilización de tales contratos de duración determinada”.

Así mesmo, establece que: “a falta de medidas adecuadas no Dereito nacional para previr e, no seu caso, sancionar, os abusos derivados da utilización sucesiva de contratos temporais, incluídos os contratos indefinidos non fixos prorrogados sucesivamente, a conversión deses contratos temporais en contratos fixos pode constituír tal medida”.

Corresponde, no seu caso, ao Tribunal Nacional modificar a xurisprudencia nacional consolidada se esta baséase nunha interpretación das disposicións nacionais, mesmo constitucionais, incompatible cos obxectivos da Directiva 1999/70 e, en particular, os da cláusula 5".

En definitiva, con estas dúas consideracións, o TXUE vén ditaminar que nin o proceso de estabilización é acorde coa Directiva Europea nin a indemnización establecida na Lei 20/2021 é unha medida disuasoria para evitar o abuso de temporalidade. Ao mesmo tempo, determina que a conversión de temporal a fixo pode ser unha medida axeitada e que, se é preciso, deberá modificarse a xurisprudencia se esta se basea nunha interpretación das normas nacionais, incluída a propia Constitución, que resulte incompatible coa citada cláusula 5.

Aínda que non cabe aplicar directamente esta sentenza ás persoas funcionarias interinas en situación de abuso de temporalidade, non nos cabe a menor dúbida de que cando, en breve, teña que pronunciarse o TXUE en casos similares de funcionarios interinos, a liña argumental non pode ser diferente á establecida para este caso pois, pola contra, produciríase o que se coñece como discriminación por razón do vínculo laboral. Por iso, o STEG está convencido de que non tardaremos en coñecer unha nova sentenza que colmará unha das súas reivindicacións históricas e, atendendo a esta previsión, propoñeremos á Xunta que, dado que finalizou o proceso de estabilización de xeito claramente insuficiente, adopte as medidas necesarias para garantir que se cumpra co que establece esta sentenza e non se produzan novamente situacións de abuso de temporalidade.

Neste enlace podedes ver o webinar feito por STE-CLM que analiza esta sentenza do tribunal europeo (comeza no minuto 58:10) https://www.youtube.com/watch?v=f1mIwaEaZcY