17 DE MAIO. DÍA DAS LETRAS GALEGAS

Por cuarta vez nun ano, a cidadanía manifestouse en contra da política lingüística do goberno de Núñez Feijoo

Unha convocatoria máis para defender a lingua propia de Galiza e as cidadás e cidadáns volveron a superar as mellores expectativas, milleiros de persoas volveron a encher as rúas de Compostela para, ademais de homenaxear a Uxío Novoneyra, manifestarse en contra da política lingüística que está a desenvolver o goberno de Núñez Feijoo.

Esta é a cuarta gran manifestación convocada contra a política lingüística da Xunta que, pese a estas protestas masivas na rúa, os ditames da Real Academia da Lingua, do Consello da Cultura Galega, da emenda á totalidade do Consello Escolar de Galicia e, por último, o ditame do Consello Consultivo de Galicia (que recolle no seu ditame que a quen lle corresponde decidir a lingua vehicular no ensino é á administración educativa e non ás familias), segue cos seus tempos á hora de levar adiante o seu decreto de plurilingüismo.

Ao igual que, como dixo a familia de Uxío Novoneyra: “Hoxe está aí convosco, chantado no medio da praza, en favor da lingua, a base da nosa identidade e do noso ser”, o STEG tamén estivo.

Secretariado Nacional do STEG
Maio 2010