ACORDO AGRUPAMENTOS

O STEG comeza a súa campaña de denuncia do incumprimento, por parte da Consellaría de Educación, do Acordo de Agrupamentos

A FEGAMP ofrécelle ao STEG a súa mediación para que se cumpra o acordo da Xunta coas centrais sindicais sobre a ratio de alumnado nos agrupamentos de unidades de infantil e primaria

Representantes do secretariado nacional do STEG informaron a Carlos Fernández que, de facerse efectiva a conxelación do acordo anunciada por Educación, deixaríanse de crear as 104 novas unidades previstas no 2º ano de aplicación do acordo e moitas funcionarían con ratios de alumnado por riba da media

O presidente da Fegamp, Carlos A. Fernández Castro, ven de recibir aos membros do Secretariado Nacional do STEG, Maiuca Cortón e Pepe Cabido. Este encontro enmárcase na campaña que o sindicato do ensino está a realizar para informar sobre o incumprimento por parte da Xunta do acordo subscrito cos sindicatos sobre as ratios nos agrupamentos de infantil e primaria.

Segundo explicou o STEG a consecuencia desta conxelación do acordo non se crearán as 104 novas unidades previstas, non os mais de 100 postos comprometidos. Ademais podería chegarse a incumprir a propia LOE ao ter alumnado matriculado por riba das ratios establecidas. Outra consecuencia deste incumprimento será a desigualdade entre centros e Concellos afectados xa que se dará o caso de que nun mesmo concello haberá centros cunha ratio distinta. Algún exemplo disto son os seguintes centros e concellos:


Exemplos de centros onde se cumpriu o acordo o curso pasado:
EEI Caamaño. Porto do Son
CRA de Tui o curso pasado creáronlle dúas novas aulas polo acordo que van seguir funcionando este curso, mentres que no CEIP de Randufe non llo van conceder este ano.
CRA da Picaraña. Ponteareas. A unitaria de A Portela hai un desdobre desde o pasado curso
CEIP de Armenteira. Meis
CRA Antía Cal. Gondomar.
Concellos nos que vai haber "agravio comparativo": Porto do Son, Tui, Ames, Boiro,Vilalba...ata 66 en total.

O presidente da Fegamp comprometeuse a trasladar a información recibida aos concellos afectados e a súa vontade de mediar para que se cumpra o acordo entre a consellería de Educación e os sindicatos.

O tempo é un factor importante, segundo apuntaron os representantes do STEG, xa que este mesmo mes se está a comunicar a cobertura de prazas vacantes para o vindeiro curso.
Nos vindeiros días continuaremos a rolda de reunións cos grupos parlamentares do Parlamento de Galiza seguindo coa campaña informativa que remate coas mobilización de setembro se a Consellaría segue a incumprir o que asinou co STEG e as outras centrais sindicais.

A Consellaría recorta dereitos ao alumnado do rural ao incumprir o acordo sobre as ratios nos agrupamentos de unidades de Infantil e Primaria

Déixanse de crear máis de 100 postos de traballo tal e como comprometía o acordo. Máis de 100 unidades funcionarán cunha ratio superior á establecida.

No curso pasado o STEG, xunto con outros sindicatos, asinou coa Consellaría un acordo que no seu momento supuxo evitar a supresión de máis de 300 unidades e a creación en dous cursos de máis de 160 novas unidades. Ademais dun acordo que melloraba substancialmente a calidade do ensino público, ía supoñer a creación da máis de 200 postos de traballo (na súa inmensa maioría no rural).

Este incumprimento vai provocar a desigualdade entre centros ao rexerse uns por unha ratio e outros (podendo ser do mesmo concello) por outra distinta. Daranse moitos casos nos que, por exemplo, un centro con 19 alumnos/as de infantil teña dúas unidades e o colexio do lado teña que funcionar cunha soa aula e consecuentemente cun profesor ou profesora menos.

Unha vez máis o argumento da crise segue a recortar onde máis se precisa investir. Ao peche de comedores e de colexios no rural hai que sumarlle agora esta medida, mentres millóns de euros se están a desviar para o ensino clasista concertado mediante subvencións aos colexios que segregan por sexo, a dotación de ordenadores do plan ABALAR, e con toda seguridade na creación de centros plurilingües.

Ante esta situación o STEG inicia hoxe un conxunto de medidas de carácter informativo e mobilizador con obxectivo de que no inicio do vindeiro curso toda a comunidade educativa se manifeste contra esta traizón ao profesorado e ao ensino no rural co que se tiña adquirido un compromiso.

AMPLIACIÓN DA INFORMACIÓN SOBRE O ACORDO

Ata o curso 2008-2009, para agrupar nunha mesma unidade, e dicir nunha mesma aula, alumnado de distintos cursos ou mesmo de distintos ciclos, a consellaría viña manexando, con carácter xeral,os seguintes criterios:
- alumnado de distintos cursos ou ciclos de Primaria: máximo de 16 alumnos
- alumnado de educación Infantil: máximo de 20 alumnos

A finais de 2009 a Consellaría mandou unha circular á inspección segundo a cal para o seguinte curso se podería agrupar en todos os niveles ata un máximo de 20 alumnos por aula.
Esta circular supoñía a supresión de máis de 300 unidades de Ed. Infantil e Primaria ao pasar de 16 a 20 o nº de alumnado que podía haber nunha unidade de primaria.
Loxicamente case a totalidade dos centros afectados estaban no rural.

A unánime oposición sindical a esta medida conseguiu que a consellaría retirase a circular e se abriran negociacións para estipular as ratios no caso de agrupamentos de distintos niveis.

Como froito desas negociacións, o STEG, CCOO, UXT e ANPE acadamos un histórico acordo coa administración que se resume nos seguintes criterios:
- alumnado do mesmo ciclo de primaria: máximo de 14
- alumnado de distintos ciclos de primaria: máximo de 12
- alumnado de toda a etapa: máximo de 10
- alumnado de educación infantil: máximo 14
- alumnado de educación infantil se hai de 3 anos: máximo de 12
- alumnado de infantil e primaria: máximo de 10

Este acordo sen ningunha dúbida é o mellor que se ten asinado en todo o estado en canto a ratios.

Aparte de evitar o peche de máis de 300 unidades significaba a creación de máis de 160 novas unidades. Subliñar por exemplo que no ensino infantil o alumnado máximo por unidade (aula) baixaba de 20 a 14 ou 12 segundo o caso.

As supresión de unidades xa estaba paralizada e para a creación das novas, o acordo contemplaba un 50% no curso 2009-2010 e o 50% restante no curso 2010-2011.

Segundo os nosos datos, para este curso queda pendente a creación de 104 novas unidades repartidas por provincias como segue:

Secretariado Nacional do STEG
xullo 2010