A sentenza do Supremo sobre o galego no ensino defende a idea de que as nais e pais non poden impoñer a ignorancia lingüística sobre as fillas e fillos

Para o STEG a recente sentenza do supremo ven poñer un pouco de sentido común no debate dos últimos meses sobre o galego no ensino. Desde o inicio deste debate o STEG defendeu a idea de que a escola debe garantir a competencia lingüística na lingua propia de Galiza ( a única non garantida ) e que este obxectivo debe ser compartido por toda a sociedade galega para que ningunha crianza fique sen esta aprendizaxe e polo tanto non haxa, ao saír da escola, analfabetos lingüísticos.

O debate suscitado por parte dos grupos ultraconservadores sobre a imposición e elección das nais e pais en materia lingüística foi, e é, cualificado polo STEG de falso no tocante á imposición e falaz no tocante ao da elección. Para o STEG ningún dereito das nais e pais sobre as fillas e fillos pode coartar os dereitos das crianzas á aprendizaxe. Non podemos invocar un pretendido dereito de elección para converter ás nosas fillas e fillos en analfabetos lingüísticos. Tampouco se pode invocar para impedir o futuro dereito de elección de lingua das nosa fillas e fillos xa que sería imposíbel a elección se coartamos o coñecemento.
Neste sentido o STEG valora positivamente a sentenza e felicita a toda a sociedade galega xa que apuntala o camiño da maioría social deste País que desexa e quere o coñecemento do galego, para o que é preciso mellorar as políticas de normalización lingüística e así conseguir o obxectivo da competencia lingüística do noso alumnado.

Demandamos da Administración galega a volta ao sentido común que marca esta sentenza do Supremo e que dea marcha atrás nas acción involucionistas que supuxeron as medidas que leva tomado e que volva ao verdadeiro consenso adoptando as medidas necesarias para inverter a tendencia que anuncian os estudos serios de sociolingüística.

A realidade lingüística e sociolóxica de Galiza- a pesares da perda de galegofalantes- aínda pode invitar ao optimismo se toda a clase política deste país está a altura das circunstancias e, deixando de xogar co idioma, traballa polo obxectivo común de que en Galiza se fale en galego con normalidade.

Documento en pdf para imprimir

Secretariado Nacional do STEG
Novembro 2009