STEG ó día · Campañas · Transporte escolar

No STEG , conscientes da problemática existente co trasporte escolar, estamos a levar unha campaña polos centros, co fin de plantexarlle á Administración unha proposta de solución para este tema.

É a nosa primeira intención recoller canta información poidamos sobre as diversas casuísticas que poidan ter relación co transporte escolar, xa que sabemos polas consultas que nos chegan que son un conxunto delas variado e, moitas veces, complexo.

Son moitos os centros ou grupos escolares que teñen que modificar os seus horarios ou que non poden adoptar a xornada continua, co único motivo de teren que se adaptar á dispoñibilidade da empresa de transportes correspondente, quedando os criterios educativos e organizativos do centro supeditados aos intereses de quen ten que garantirlle un servizo.

É tamén frecuente de máis a impuntualidade e/ou imprecisión no funcionamento do transporte, autobuses que deixan ao noso alumnado demasiado cedo, que o recollen tarde, ou que establecen o punto de subida e baixada demasiado lonxe do centro. Isto orixina unha situación de indefinición na responsabilidade civil sobre os nosos menores durante ese espazo ou tempo, onde están fora do horario e do recinto educativo pero non hai ninguén ao seu cargo. Unha responsabilidade que podería recaer no colectivo de profesionais do ensino.

Pensamos que é importante abordar estas situacións particulares cunha perspectiva de acción conxunta, e por iso solicitamos a túa cooperación.