O Consello Escolar do Estado entende contraditoria a materia de relixión en centros públicos coa aconfesionalidade do Estado que a Constitución recolle.
Baixo o valor que lle outorga ao Consello Escolar do Estado ser o organismo onde ten voz e voto a totalidade da comunidade educativa: alumnado, profesorado, familias, sindicatos, Ministerio, patronais, titulares de centros, persoal de administración e servizos, universidades e personalidades de recoñecido prestixio, decidiu por maioría o pasado mes de xullo declarar os acordos sobre ensino relixioso en centros públicos "claramente contraditorios" coa aconfesionalidade do Estado recollida na Constitución.
É a primeira vez que o Consello se pronuncia a favor dunha medida semellante. A proposición, que levou adiante a Confederación de STEs-i, á que o STEG pertence, non negaba o mandato constitucional de ofrecer educación relixiosa: iso, dicía, "pode e debe cumprirse, pero fóra do horario escolar". Fíxose tamén referencia a que a Administración educativa poida emprestar os seus edificios públicos para que estas actividades se impartan, "pola tarde, os fins de semana, cando sexa, pero liberando o horario escolar deses programas, dado tamén que así se contempla noutros países". O Consello Escolar do Estado considera que "os poderes públicos poden garantir perfectamente o dereito constitucional dos pais a que os seus fillos e fillas reciban a formación relixiosa e moral que estea de acordo coas súas propias convicións, mais sen que esta formación teña que estar incluída entre as materias a impartir con carácter obrigatorio dentro do horario escolar. Por iso se insta ao Goberno a que realice os cambios lexislativos oportunos para que os ensinos relixiosos saian do currículo escolar". Así se propuxo e así ficou aprobado.