STEG ó día · STEG opina

Curso tras curso, os centros públicos asumen novos programas e estudan o aumento da oferta que mellore a súa calidade educativa e a da comarca en que están insertos. Este é o caso do IES de Chapela-Redondela e do CIFP A Xunqueira de Pontevedra, que ano tras ano veñen solicitando á Consellería a impartición do ciclo de Integración Social.

A Consellería, porén, ven de denegar a estes centros públicos citados a súa solicitude, mentres que, ao mesmo tempo, concédello a dous centros privados de Vigo: o CPR San José de la Guía (autorizado anteriormente) e o CPR Aloya.

As nais e pais que queiran matricular as fillas ou fillos neste ciclo veranse na obriga de matriculalos nun colexio concertado, o colexio CPR Aloya, ao que, por sentenza recente do TSXG trala correspondente demanda interposta polo STEG contra a segregación por sexo que practicaba ese centro co alumnado, deben serlle retirados os cartos públicos que recibía en virtude do concerto que o citado tribunal declarou ilegal.

A Consellaría fúrtalle así ás familias esa “liberdade de escolla de centro” da que logo tanto presume, xa que a oferta pública equivalentre máis próxima está nada máis e nada menos que a máis de 100 Km. A ninguén enganan xa co que agocha esa “defensa” da “liberdade de escolla”: agocha un engano para que as familias de mellores medios, ademais de escoller un ensino privado que deberían sufragarse elas mesmas, obteñan recursos públicos.

Digámolo alto e claro: a Consellaría elimina recursos públicos para bolsas, libros de texto, comedores… que son desviados para os centros privados segregadores, de ideario educativo elitista e ultraconservador.

O STEG demanda da Consellería a concesión destes ciclos aos centros públicos que o solicitaron e que deteña a irracionalidade e o despilfarro do dobre gasto educativo: tendo centros públicos abertos e con profesionais recoñecidos, aumenta o gasto concertando ciclos nos centros privados.

O STEG vixiará a legalidade desta concesión estudando as posibles acción legais contra unha Consllaría que priva á cidadanía de Pontevedra e Redondela, neste caso, do dereito constitucional ao ensino público.

Secretariado Nacional do STEG
Xullo 2013