STEG ó día · STEG opina

A Consellaría, no DOG de hoxe 14 de agosto de 2013, publica a ORDE do 9 de agosto de 2013 pola que se aproban os concertos educativos cos centros docentes privados de educación infantil, educación primaria, educación secundaria obrigatoria, educación especial, programas de cualificación profesional inicial e ciclos formativos de graos medio e superior. Na publicación apróbanse os concertos aos centros Acacias, Montecastelo e Aloya en Vigo e Montespiño e Peñarredonda na Coruña. A sentenza do TSXG declarou inválidos os concertos con estes centros.

A sentenza, que anulaba claramente os concertos por ir contra a LOE, podería terse executado xa que o rercurso ante o Supremo, presentado polos centros, sábese que non prosperará. Desde o STEG sabemos a imposibilidade de que o recurso vaia adiante xa que a doctrina xurídica do Supremo noutros casos similares foi clara declarando ilegais estes concertos. Por este motivo a argumentación da Xunta dunha posible sentenza favorable a estes centros é falaz e agocha a verdade desta Consellaría: o desvío de cartos públicos para colexios ultraconservaodres, elitistas e segregadoes mentres recorta no público.

Estamos, xa que logo, ante una resposta política, xa que tendo na man una xustificación xurídica para o aforro de cartos públicos, decídese seguir a desviar partidas económicas para centros de élite mentres no ensino público reducen profesorado, pechan escolas no rural, fan pagar ao alumnado transportado o servizo de comedor, á vez que os van eliminando, reducen as bolsas de estudo…

Semella que a crise e a xestión de recursos só se ten en conta cando é para recortar servizos e dereitos para a maioría da poboación e non para certos grupos de presión ultraconservadores e próximos ao fundamentalismo católico.

Ademáis, esta decisión deixa en evidencia a propia palabra do Presidente da Xunta que declaraba naquel momento que acataría a sentenza. Para o STEG, o goberno da Xunta está a acatar a presión que sobre a Xunta exercen estes grupos minoritarios antepóndoa á sentenza do Tribunal Superior de Xustiza de Galiza por motivos de interese particular e non de interese xeral.

Este goberno incumpre, premeditadamente, a sentenza e aproba os concertos con estes centros por un período de catro anos, cunha Orde publicada en período vacacional para que a comunidade educativa non poida reaccionar como se merece esta medida.

O STEG seguirá loitando para que a sentenza, non recurrida pola Consellaría, se cumpla.

Secretariado Nacional do STEG.
14 de agosto de 2013