STEG ó día · STEG opina

A Xunta recorta o gasto en educación pública, o que afondará na crise económica

Redución no investimento en educación

A Xunta de Galiza anunciou unha redución de 200 millóns nos seus gastos. Co beneplácito da Consellaría de Educación reduce o seu investimento (75 millóns entre educación, sanidade e traballo) o que redundará negativamente na calidade do ensino galego. A decisión da Xunta de Galicia e da Consellaría de Educación fará que a educación das nosas crianzas empeore dificultando tanto a súa formación e, xa que logo, o acceso ao mundo laboral.

A saída da crise económica, tal e como se fai noutros países da nosa contorna, debe contar cunha aposta firme e decidida pola formación das futuras xeracións. Estamos ante un goberno de grandes lemas, de uso propagandístico para vender cortiñas de fume que agochan retrocesos sociais.

Este gasto en educación só pode ser entendido desde posturas pouco interesadas no ensino público como un factor de transformación social para a formación integral das persoas e reequilibrador das desigualdades sociais.

Neste sentido, desde o STEG, esiximos que se manteñan os recursos económicos para o sistema educativo público de ensino e mesmo que se aumenten ata chegar ao gasto dos países da nosa contorna.

Só unha aposta decidida pola educación (e a cuestión orzamentaria é un eixe) nos permitirá construír unha sociedade máis democrática, máis crítica, máis igual, mellor formada para afrontar o seu futuro persoal e social.

Para o STEG esta decisión representa outro paso atrás para o ensino público galego polo que demandamos un cambio de rumbo para non danar un dos bens mais prezados co que conta a nosa poboación: o dereito a un ensino público de calidade e igualitario.

Secretariado Nacional do STEG
Abril 2010

Documento en pdf para imprimir