STEG ó día · STEG opina

A improvisación como guía para a selección dos centros

O Proxecto Combas

O Proxecto Combas (de consolidación de competencias básicas) é un dos programas de Cooperación Territorial 2010-2011 que desenvolve o MEC xunto coas Consellerías e Departamentos de Educación das diferentes CCAA. A financiación do mesmo, realízase ao 50% entre a Administración autonómica e a estatal naquelas comunidades que teñen competencias transferidas en materia de educación.

Con este proxecto preténdese apoiar neses centros (150 en toda España) o desenvolvemento curricular da educación por competencias, coñecer a situación de partida e o proceso do ensino por competencias ou mellorar a formación permanente do profesorado entre outros aspectos.

A selección dos centros para levar a cabo dito proxecto, noutras comunidades, segue uns protocolos básicos: solicitude por parte do centro, documento informativo sobre a experiencia que posúe o centro no traballo por competencias, certificación do equipo directivo amosando a súa colaboración, certificación do Consello Escolar e do Claustro do compromiso acadado…

En Galiza, a selección fíxoa directamente a Administración entre aqueles centros (8-9 en total) que xa foran seleccionados para desenvolver os Plans de autoavaliación e mellora da calidade da educación (Orde de 10 de maio de 2010). A razón disto, segundo nos informan, é a falta de tempo e de información para desenvolver o protocolo anteriormente citado.

Dende o STEG cremos que a Administración galega debería ter seguido un protocolo de actuación como se fixo noutros territorios nos que non se deixou esta importante tarefa á improvisación.