STEG ó día · STEG opina

Non ao cambio de modalidade de prestación do servizo dos comedores escolares.

Comedores escolares

O día 28 de maio, concentrámonos diante do edificio multiusos da Xunta os e as delegadas dos sindicatos STEG e CCOO, xunto coas nais e pais do alumnado que acude aos colexios da Ponte de Doiras, Aníbal Otero (Ribeira de Piquín) e Vicente Casabella (Ourol).

Con este acto quixemos amosar o noso total desacordo coa intención da Consellaría de cambiar a modalidade de prestación do servizo dos comedores escolares destes colexios do rural lucense.

O STEG manifesta o seu total rexeitamento ao continuo desmantelamento de servizos públicos no rural. Entendemos que a “rendibilidade económica” non é o único argumento para pechar servizos, existe unha “rendibilidade social” que non ten nada que ver coa anterior e que, nalgúns casos, pode ser deficitaria economicamente pero rendible socialmente.

Ao mesmo tempo, denunciamos a posible privatización deste servizo de comedor a través de caterings ofertados por empresas privadas coa conseguinte diminución na calidade do mesmo.

Secretariado Nacional do STEG
maio 2010