STEG ó día · STEG opina

O STEG denuncia a discriminación do galego, ao respecto da outra lingua cooficial, nas probas das oposicións

Oposicións: proba de galego

Seguindo coa súa política desnormalizadora e involucionista con respecto á lingua galega, a Consellería de Educación e O.U. agasállanos cunha nova medida discriminatoria, ademais de non cumprir cos seus compromisos verbais coas organizacións sindicais na mesa sectorial.

Cando se negociaron as ordes das convocatorias de procedementos selectivos de ingreso ao corpo de mestres e aos corpos de ensino secundario, música e artes escénicas e profesores técnicos de formación profesional, o STEG solicitou, na mesa sectorial de educación do día 25 de febreiro do 2010, que se esixira na proba de coñecemento do galego, cando menos, o mesmo dominio que se esixe para a do castelán, isto é, que a proba de coñecemento do galego sirva para comprobar a posesión dun nivel adecuado de comprensión e expresión oral e escrita e non, como din finalmente as ordes, só a nivel escrito para o galego e oral e escrito para o castelán.

O STEG preguntou na mesa sectorial a qué era debida esta discriminación entre unha lingua e outra. A resposta do Subdirector Xeral de Centros e Recursos Humanos foi que aceptaba a proposta do STEG dicindo que “ían ter o mesmo tratamento”.

Isto foi o que se nos dixo, e o que queda escrito na acta da mesa, pero non o que está reflectido nos DOGs do 25 de marzo e do 5 de abril, onde o tratamento que se da á acreditación do coñecemento das dúas linguas é diferente e discriminatorio para a lingua galega.

O STEG solicitou que se faga unha corrección de erros das dúas ordes para que se cumpra o que foi aceptado na mesa de negociación.

Secretariado Nacional do STEG
Abril 2010

Arquivo en pdf para imprimir