STEG ó día · STEG opina

O STEG, en cumprimento de parte dos acordos acadados o pasado sábado 26 de setembro no seu último Secretariado Nacional, vén de dirixirse á Consellería para demandarlle que tome medidas, no camiño de resolver as problemáticas de parte do profesorado e alumnado con diversidade funcional auditiva.

O sindicato tivo constancia neste comezo de curso de varios casos de compañeiras (na provincia de Pontevedra e Coruña) que, presentando diversidade funcional auditiva en distintos graos e formas vense, no actual contexto, impedidas para desenvolveren con normalidade o seu traballo. As máscaras faciais contempladas para uso do profesorado, nin no Protocolo da COVID-19 nin nas especificacións da versión para o alumnado con necesidades educativas especiais, reflicte a posibilidade do uso das máscaras transparentes para o profesorado (porén, si se contempla esa adaptación para o alumnado).

Paralelamente, tivemos constancia tamén de que está a haber certas incidencias relativas á dotación de intérpretes de linguaxe de signos, referidas á súa ausencia en centros que así o precisan.

No camiño de tentar solventar esta situación e avanzar na resolución destas problemáticas, o STEG rexistrou hoxe mércores por escrito dous documentos (ver documento adxunto co escrito), un dirixido ao titular da Xefatura Territorial de Educación de Pontevedra e outro ao titular da Dirección Xeral de Centros e Recursos Humanos. Paralelamente, o STEG acordou incorporar esta cuestión para o seu tratamento e debate nas catro Xuntas de Persoal de cada unha das provincias.

Entendemos que o actual contexto non debe impedir que o profesorado e o alumnado con diversidade funcional e/ou necesidades educativas especiais vexa comprometidas as súas condicións de traballo e o seu dereito á educación en condicións de igualdade de oportunidades, atendendo aos principios de equidade, inclusión e xustiza social.

Paralelamente, o STEG iniciou contactos con algúns grupos parlamentarios que mostraron intención de levar estas situacións ao Parlamento e, nos próximos días, deberan concretarse en reunións coas traballadoras afectadas.

COMISIÓN PERMANENTE DO SECRETARIADO NACIONAL DO STEG