04-03-2010

O profesorado interino pode perder o dereito a permutar

Profesorado Interino e permutas

A Consellería volve a dar mostras do seu facer lesivo dos dereitos adquiridos nos últimos anos; neste caso, o obxecto do seu ataque é o profesorado interino, a quen pretende deixar sen o dereito a permutar neste curso escolar 2009-2010.
En contra do criterio e da práctica habitual de anos pasados, a Consellería vai tomar a decisión, sen consultar ás OO SS, que o profesorado interino non ten dereito a permutar. Para amparar ese cambio de criterio na legalidade vixente argumentan o seguinte:

o profesorado interino non pertence ao corpo de funcionarios e funcionarias do Estado, que é o único corpo ao que se lle recoñece ese dereito na lexislación de ámbito estatal -RD 2112/1998, polo que se regulan os concursos de traslados de ámbito estatal para a provisión de prazas correspondestes aos corpos docentes.

ignorar a Orde do 17 de xuño de 2004 pola que se regulan as permutas provisionais, que no seu artigo 2º (solicitantes) indica: “Poderán solicitar permuta provisional, dous ou máis funcionarios de carreira, en prácticas ou interinos, en servizo activo dos corpos docentes que impartan ensinanzas escolares, sempre que vaian desempeñar a súa función docente no centro educativo durante o curso académico correspondente”, alegando que contradí o espírito dunha norma de rango superior.

No STEG non ignoramos que esa alegación obedece a razóns de tipo político, pois a orde estaba consensuada polas OO SS, recoñecida pola Administración e aceptada polo profesorado, tanto interino como funcionario.
Dende o STEG denunciamos, xa que logo, esta decisión política que vulnera dereitos adquiridos polo profesorado interino e que significa un retroceso na negociación de dereitos de aplicación no ámbito nacional non recoñecidos pola lexislación estatal.
Dende o STEG esiximos, xa que logo, a continuidade da práctica habitual dende o ano 2004, que non xeraba malestar nin implicaba custe económico ningún a maiores.

Secretariado Nacional do STEG
Galiza, setembro de 2009

Escrito enviado ao conselleiro (pdf)