STEG ó día · STEG opina

Recorte da oferta formativa na FP e aumento do número mínimo de alumnado por ciclo

Ciclos Formativos

A Consellería de Educación recorta en 20 ciclos a oferta de ciclos formativos para o vindeiro curso 2010-2011, 6 ciclos medios e 14 ciclos superiores. Continúa co desmantelamento do ensino público, afondando nas desigualdades entre provincias, xa que 7 dos ciclos que desaparecen son da provincia de Lugo.

Esta oferta leva ao peche de 4 ciclos en centros nos cales eran a única ensinanza de Formación Profesional, polo que o alumnado destas localidades (As Pontes de García Rodríguez, Becerreá, Monforte de Lemos e Ourense) verase obrigado a grandes desprazamentos para acceder a este tipo de ensinanzas.

O número mínimo de solicitudes, para cada ciclo formativo, increméntase de 8 a 12 nas cidades da Coruña, Ferrol, Ourense, Pontevedra, Santiago de Compostela e Vigo, e de 6 a 8 solicitudes en cada centro do resto de Galiza. Este incremento vai provocar un recorte da oferta de ciclos no ámbito rural ca consecuente perda de servizos e dereitos do alumnado e da poboación en xeral.

Neste sentido, desde o STEG, esiximos que se incremente a oferta pública da Formación Profesional e non se valore o ensino público dende criterios de rendibilidade económica. A saída da crise económica, tal e como se fai noutros países da nosa contorna, debe contar cunha aposta firme e decidida pola formación das futuras xeracións.

Dende o STEG rexeitamos a forma de proceder da Consellería que debería ter pasado esta oferta formativa por unha Mesa Sectorial na que fose negociada coas OOSS.