STEG ó día · STEG opina

O STEG non pode máis que sumarse á enorme cantidade de persoas, colectivos, movementos sociais, organizacións sindicais, asociacións culturais e entidades de todo tipo que, tanto na Galiza como no resto do Estado español, de Europa e do mundo, solidariamente, se sinten disconformes, defraudadas e indignadas coa sentenza xudiciaria do “caso Prestige”.

A catástrofe que azoutou hai agora once longos anos o noso mar constitúe, por moito que a sentenza ditada queira estabelecer unha especie de “indulto político” para os seus causantes e responsábeis, un dos maiores delitos ecolóxicos que se teñen perpetrado contra a nosa Terra (77.000 toneladas de fuel verquidas sobre o medio mariño) e tamén unha das máis palmarias probas da mentira, da incompetencia e da prepotencia como formas de (mal) goberno. Por iso mesmo, a despeito do contido concreto da sentenza coñecida este 13 de novembro de 2013, a catástrofe seguirá gravada por sempre na nosa memoria colectiva, como o seguirán os nomes e as siglas culpábeis.

Hoxe denunciamos a irresponsabilidade que esta sentenza vén consagrar como principio valedeiro no ámbito da xustiza en asuntos medioambientais, porque abre infelizmente a porta para que a decepción se poida repetir en futuros xuízos sobre impredecíbeis catástrofes provocadas pola mesma cobiza e pola mesma incompetencia que as que inundaron de chapapote as nosas vidas hai agora once longos anos.

Hoxe denunciamos que se queira converter ao pobo galego, por partida dobre, ecolóxica e económica, no único pagano desta catástrofe. Hoxe protestamos pola labazada que o sistema xudiciario propina, once anos despois, no rostro de tantas e tantas persoas que, de maneira xenerosa, solidaria e libre estiveron días e noites loitando contra a marea negra.

Coa mesma forza e intensidade que caracterizou a nosa participación no amplo movemento de unión e solidariedade que a catástrofe xerou como resposta, encarnado no Nunca Máis que resoou en todo o planeta, o STEG denuncia que agora se ditou, efectivamente, unha sentenza, mais que en ningún caso se fixo Xustiza.

Galiza, 14 de novembro de 2013