STEG ó día · Campañas · O STEG fronte á LOMCE

Menos profesorado, máis adoutrinamiento ideolóxico e máis segregación do alumnado son as claves da reforma educativa que se propón levar adiante o ministro de Educación.

O ministro Wert proponse pór en marcha unha autentica contrarreforma educativa que, por unha banda, suporá a lexitimación dunha política de recortes e, por outro, a reinstauración dun modelo ideolóxico de escola sesgado, clasista e segregador.

A contrarreforma proponse recortar as competencias das CCAA en materia educativa ao aumentar a porcentaxe dos contidos mínimos que fixa o Estado en todos os tramos educativos. Este deseño centralizador vai na liña recentralitzadora do Estado que promoven certos grupos da dereita, tomando como escusa a crise económica.

O sistema educativo ponse ao servizo das necesidades da empresa ao promover a segregación temperá do alumnado coa introdución de itinerarios en función do seu rendemento académico, e non das necesidades do alumnado como persoa e como cidadán. O STEG defendeu sempre un modelo de escola que priorice a realización do proxecto vital das persoas e da comunidade na que viven, e non das urxencias cambiantes e caprichosas dun mercado de traballo condicionado pola necesitade dun beneficio rápido da clase empresarial. A reintrodución da reválida e doutros sistemas de selección e clasificación do alumnado e dos centros sen ter en conta as condicións socioeconómicas da súa contorna, nin a singularidade individual, nin as aspiracións das persoas, converterán ao ensino nunha práctica de selección de persoal controlada polas empresas...

A creación da materia de Educación cívica e constitucional, que baleira dos contidos máis tolerantes e progresivos de EpC, e o mantemento da materia de Relixión, supón unha aposta polo control ideolóxico do sistema baixo os postulados máis conservadores e confesionais. Para o STEG, a escola debe contribuír á visualización e á aceptación dos diferentes xeitos de vivir e de buscar a felicidade propia dos e das cidadás, e non a instruír segundo pautas de conduta inspiradas nos estreitos puntos de vista dunha determinada clase social ou confesión relixiosa. Nese sentido, o STEG oponse á intención da contrarreforma de lexitimar as subvencións públicas a escolas privadas que segregan en función do sexo, ou que realizan calquera tipo de selección do alumnado por sexo, etnia, renda, ou rendemento escolar.O STEG vén demandando desde moito antes do comezo da actual crise económica que se eliminen as subvencións ao ensino concertado por supeditar o beneficio común ao beneficio propio e o dunhas minorias, potenciando no seu lugar o ensino público. Na actual situación, resulta máis urxente aínda comezar recortando nos concertos educativos, centrando todos os recursos na única escola que garante a atención a toda a poboación: a pública.

A contrarreforma será lesiva tamén para as condicións de traballo do profesorado ao transvasar o concepto de mobilidade forzosa da reforma laboral ao ensino. O profesorado, segundo as intencións de Wert, perdería o dereito á súa praza e poderíaselle obrigar a impartir ensinos diferentes no propio centro, en diferentes etapas ou nun centro diferente “por necesidades de servizo ou funcionais”. Isto, sumado aos fortes recortes nas retribucións, o aumento das ratios e o despedimento masivo de persoal interino, incide na precarización do traballo docente, especialmente na escola pública, o que pode supor, ademais, unha redución de plantillas que afectaría a decenas de miles de profesoras e profesores.

O ministro Wert pretende todo isto sen o necesario debate democrático e a busca do consenso coa comunidade educativa e a representación lexítima das traballadoras e traballadores do ensino, os partidos políticos e as comunidades autónomas.

O STEG oporase a este proxecto por todos os medios ao seu alcance, e promoverá a súa discusión e rexeitamento nas asembleas de traballadoras e traballadores. Así mesmo, animará á comunidade educativa a mobilizarse para impedir que se aprobe e se implante nos centros educativos, e a propor unha reforma que teña como obxectivo un sistema educativo emancipador, igualitario, gratuíto e respectuoso coas diferenzas individuais, sociais e de sexo.